Sunday, November 3, 2013

~~~~~මගේ පුංචි හත් පෙති මලට ආදරෙන්....~~~~~



"මල් පෙත්තේ.....මල් පෙත්තේ
උතුරු දෙසට, දකුණු දෙසට
බටහිරටත් නැගෙනහිරට
ඉගිල ඉගිල මෙ'හැම දෙසට
කැරකීලා ඇවිත් ම'වෙත
ම'කියන දේ කර දෙන් මට......"

"මට මහා ගොඩාක් ආදරේ කරන, මාව ගොඩාක් හොඳින් රැක බලාගන්න හොඳම හොඳ කෙනෙක් මට ලැබෙන්න ඕන..."

පුංචි කාලෙ ආසාවෙන් කියවපු රුසියන් කථාන්තරයක සිංහල අනුවාදය "ශේන්යා සහ හත්පෙති මල ".
හත් පෙති මලේ පෙති හතෙන් මල් පෙත්තක් කඩලා අහසට වීසි කරලා ඒ කථාවේ ඉන්න ගෑණු ළමයා- ශේන්යා ඔය  මුලින් කීව කවිය ලස්සනට හයියෙන් කෑගහලා කියලා ඊට පස්සේ එයාට ආසා දේ එයාට ලැබෙන්න කියලා ප්‍රාර්ථනා කලාම ඒ දේ ඉෂ්ට වෙනවා.මං පුංචි කාලෙදි ඔය පොත ආයිත් ආයිත් කියෙව්වෙ පුදුම තරම් ආසාවකින්.ඇත්තටම ඒ පොතටත් වඩා මන් ආසා කලේ සිතූ පැතූ දේවල් දෙන්න පුළුවන්කමක් ඇති ඒ හත් පෙති මලට.

අනේ..! මටත් ඒ වගේ මලක් ලැබෙනවා නම්..!!

පුංචි මං එදා එහෙම හිතුව වාර අනන්තයි...හැබැයි මං හත් පෙති මලෙන් බලාපොරොත්තු වුනේ ශේන්යා වගේ ලෝකෙම තියෙන සෙල්ලම් බඩු එයාගෙ වෙන්නවත්, එහෙම නැත්නම් ලෝකෙ උතුරු කෙළවරට ගිහින් එන්නවත් නෙවේ.හැමදාමත් වගේ මගේ ප්‍රාර්ථනා අතරෙ තිබුණෙ බොහොම අහිංසක පොඩි පොඩි දේවල්.

ටිකෙන් ටික ලොකු වෙද්දි මගෙ හිතේ ආදර සිතුවිලි පහළ වෙන්න  ගත්තු වයසත් එක්ක මං හැම වෙලේම ප්‍රාර්ථනා කරපු දෙයක් තමයි මට ගොඩාක් ආදරේ කරන, මාව ගොඩාක් ආරක්ෂා කරන කෙනෙක් මට ලැබේවා කියලා.ආදරේ කියන දේ ගොඩක්ම ඕන මං වගේ කෙනෙක් වෙනුවෙන් මං හොයන ජාතියෙම තවත් කෙනෙක්ව හොයනවට වඩා අර කථාවෙ එන " හත් පෙති මල " හොයාගන්න එක වඩා ලේසි වෙයි කියලා ඒ හැම වෙලාවකදිම මගේ යටි හිත මගේ ප්‍රාර්ථනා වලට ඔච්චම් කලා.ඒත් මං උත්සහය අත හැරියෙ නෑ.අවුරුදු ගාණක් තිස්සෙ මට හොයා ගන්න අමාරු වෙයි කියලා මගේම හිත 
මට විහිළු කරපු ඒ ලස්සන හත් පෙති මල මන් හැමතැනකම හෙව්වා.හැම අහුමුල්ලක් නෑරම පීර පීර හෙව්වෙ මන් ඒ හත් පෙති මලමයි.එයා කොහේම හරි කාටවත් නොපෙනෙන, කාටවත්ම හොයාගන්න බැරි තැනකට වෙලා පිපිලා ඇති කියලා මගේ උඩු හිත යටි හිතත් එක්ක හරි හරියට වාද කලා.

"හූ...ඇද්ද ? වැරදුණා නේද? ඒකනේ මම කීවෙ...හූ හූ..."

පළවෙනි වතාවට හත් පෙති මලක් කියලා වරදවා වටහාගෙන නෙලාගන්න ගියපු මලේ කටු ඇණිලා හිත හීරිලා ආපු ලේ ඇස් වලින් ගලා ගෙන එද්දි මගේ යටි හිත් මට සරදම් කලේ ඔහොමයි.ඒත් මම සැලුණෙ නෑ. එක සීරුවට ගලාගෙන ආව කඳුළු බිංදු එකින් එක පිහි දාලා ආයිමත් මම හෙව්වේ ඒ හත් පෙති මලමයි.හිතේ තිබුණ විශ්වාසය මගේ ජීවිතයට හුස්ම පිරෙව්වා.දෙවැනි තුන්වැනි වතාවටත් මං මහා හයියෙන් ඇඬුවා.අඬලා අඬලා අන්තිමටම වෙහෙස වුණු මගේ උඩු හිත යටි හිතට දිනුම දෙනවද නැද්ද කියලා කල්පනා කර කර ඉද්දි හිතුවෙවත් නැති මොහොතක පුංචිම පුංචි මලක සුවඳක් හදවතට හෙමින් සීරුවෙ දැනෙන්න ගත්තා.

නමුත් මුලදි මම ඒ මල දිහා ඇහැක් ඇරලා බැලුවෙවත් නෑ.ඒ මං හිතන්නෙ ආදරේ නිසා මං ගොඩාක් විඩපත් වෙලා හිටපු නිසා වෙන්න ඇති.වේලිලා, ඉරි තැලිලා ගිය මගේ හිත  තුන් වෙනි වතාවටත් ආදරෙන් පරාද වෙලා කඳුළු වලින් මූණ පොඟවගෙන හිටියෙ.ඇස් වලින් පැන්න කඳුළු පිටට නොපෙන්නා ඉන්න මං දැරුවෙ සුළු පටු උත්සාහයක් නෙවේ.ඒත් කාලය මැදිහත් වෙලා බොහොම අපූරු විදියට මට ඇත්ත පහදලා දුන්නා.

කොච්චර කඳුළු හංගන්න හැදුවත්, කොච්චර හිතේ දුක හිර කරගන්න හැදුවත්, මගේ හිතේ තද වෙලා, ගුලි වෙලා තිබුණු දුක දිහා හැමදාම පුංචිම පුංචි මලක් බලාගෙන ඉඳලා තිබුණා.එක දවසක් ඒ පුංචි මල්ට මං විඳින දුක දරාගන්න බැරිම වුණා.එහෙම දවසක, ඒ පුංචි මල,මං අවුරුදු ගාණක් තිස්සෛ හොය හොයා හිටි හත් පෙති මලක් වෙලා මෙතෙක් කල් හැංගිල හිටපු අඳුරු මුල්ලෙන් එළියට ඇවිත් මගේ මුළු හිතම සුවඳ කරගෙන අපූරුවට තමන්ගෙ පෙති එකි'නෙක විහිදුවන්න ගත්තා.

හත් පෙති මලේ කථාවේ පුංචි ශේන්යාට හත් පෙති මල ලැබුණේ මන්තර කාරියකගෙන්. ඒ මලට තිබුණේ පෙති හතයි.පෙති හතක් කියන්නේ ප්‍රාර්ථනා හතයි. ඒ කියන්නේ කොහොම කලත් ශේන්යාට ඉඩ ලැබුණෙ ප්‍රාර්ථනා 7ක් කරන්න විතරයි.ඒත් මට ලැබුණු හත් පෙති මල ඊට වඩා වෙනස්.ඒ මලේ පෙති කවදාවත් ඉවර වෙන්නේ නෑ.ඒ මල මට ලැබුණට පස්සෙ මගෙ ජීවිතේ සතුට, ආදරය, රැකවරණය මේ හැමදේම මගේ හිත පුරාම මට ලැබුණා. අන්තිමට මං හිතපු දේම මට ලැබුණා.

කාලාන්තරයක් තිස්සෙ මං ප්‍රාර්ථනා කරපු දේ ඉෂ්ට වුණා....!!!

තමන් ආදරේ කරනවාටත් වඩා වැඩියෙන් තමන්ට ආදරේ කරන කෙනෙක් ලබන්න අපි කවුරුත් කැමතියි.ඒත් ඒ ආසාව ඉෂ්ට වෙන්නේ කීයෙන් කී දෙනාගෙද? මමත් ඒ අතලොස්ස අතරින් එක්කෙනෙක්. ඇත්තටම ඒ සතුට කියලා නිම කරන්න බෑ.

ඔයා අද මගේ ජීවිතේම කොටසක් වෙලා. මං මෙතුවක් කාලෙකට ලබන්න ආසම කරපු මගේ පුංචි හත් පෙති මල වෙලා.ශේන්යාට වඩා මන් මහ ගොඩක් වාසනාවන්තයි.ශේන්යාගෙ එක ප්‍රාර්ථනාවක් සීමා වුණේ එක මල් පෙත්තකට විතරයි.ඒත් මගේ හත් පෙති මල එහෙම නෑ.මගේ හැම ප්‍රාර්ථනාවක්ම , මගේ හිතේ ගුලි කරන් ඉන්න හැම ආසාවක්ම සමහර විට මං කියන්නත් ඉස්සෙල්ලා මට ඉෂ්ට කරලා දෙනවා.මිල කරන්න බැරි තරම් මගේ හත් පෙති මල මට වටිනවා.ඒ වගේම ඔයා මගේ ජීවිතේ සුවඳ කරන හැම තත්පරයකදිම ඒ සුවඳ මගෙ මුළු ජීවිත කාලෙටම නොවෙනස්ව රඳව ගන්න මං මගේ උපරිමයෙන්ම කැප වෙනවා.

ආදරේ කියන්නේ හරිම පුදුමාකාර දෙයක්.මළාණික වෙච්චි හිතක් ප්‍රබෝධමත් කරලා ජීවිතේම නැවුම් හැඟීම් වලින් පුරවන්න ආදරේ බිංදුවකටත් පුළුවන්.හිතාගන්න බැරි දේවල් කරලා අසීමිත සන්තෝසයකින් මුළු හිතම පුරවන්න ආදරේට තියෙන්නේ හරිම අපූරු හැකියාවක්.හිතාගන්නවත් බැරි වෙලාවක මගේ ජීවිතය සුවඳවත් කරගෙන පිපුණු ඔයාගෙයි මගෙයි ආදර කතාවට තවම මාස 5 1/2ක් විතරයි.අපේ පුංචි හීන, බලාපොරොත්තු වලටත් තවම ඒ හැටි වයසක් නෑ.ඒත් ඒවා කවදාවත් වෙනස් වෙන බලාපොරොත්තු නෙවේ.ඒඉවා ස්ථිරයි.මේ මාස 5 1/2 ඈතුලෙ මාව සතුටින් තියන්න ඔයාගෙ ආදරේ මොනතරම් දේවල් කළාද? ඒ හැම දෙයක්ම වචන වලින් විස්තර කරලා ලියන්න තරම් මං පොහොසත් නෑ.

මගේ උපන්දින මාසය පුරාම ඔයා වස්සපු තෑගි වරුසාව දිහා බලද්දි මට මතක් වෙන්නෙ ආයිමත් ශේන්යාව 
ඇයි දන්නවද?
ඒ කථාවේ එක් තැනක හත් පෙති මලේ මල් පෙත්තක් කඩලා අහසට විසි කරලා ශේන්යා ඉල්ලන්නෙ "මුළු ලෝකෙම තියෙන සෙල්ලම් බඩු මගෙ වෙන්න " කියලා.ඒ ප්‍රාර්ථනාවෙන් මොහොතක් යන්න ඉස්සර හැම දිශාවකින්ම ශේන්යා දිහාට සෙල්ලම් බඩු වැස්සක් වහිනවා.මා මතක් වුණෛ ආන් ඒ වැස්සමයි.ඒත් ඒ වස්සෙයි මේ වැස්සෙයි අතර ලොකු වෙනසක් තියෙනවා.මෙහෙම උපන්දින තෑගි වරුසාවක් මගෙ මුළු ජිවිත කාලෙදිම මං බලාපොරොත්තු වුණ දෙයක් නෙවේ.ඒත් ඔක්තෝබර් 19 වෙනිදාට යෙදුණු මගේ උපන්දිනය දා එළඹෙන්නත් කලියෙන්ම ඒ කියන්නෙ ඔක්තෝබර් 16 වෙනිදා ඉඳන් ඔක්තෝබර් 31වෙනිදා වෙනකම් මගේ හත් පෙති මල තෑගි වරුසාවකින් මාව නෑව්වා.

" මට ඕන මුළු ඔක්තෝබර් මාසෙම ඔයාට තෑගි දෙන්න"

ඒ වචන කියන හැම මොහොතකම පුංචි දරුවෙක්ගෙ වගේ ඔයාගෙ ඇස් දීප්තිමත් වෙලා දිළිසෙන අපූරුව, එවෙලෙට මූණේ ඇඳෙන ලස්සන හිනාව දකිද්දි මගේ හිතේ ඔයාට තියෙන ආදරේ තවත් උතුරනවා. තෑගි දස දහසකටත් වඩා මට ඔයාගෙ ඒ හිනාව වටින නිසා.

ඉතින් මගේ රත්තරන්,

ඒ හැම තෑග්ගටම ගොඩාක් ස්තූතියි.මගේ පුංචි හත් පෙති මල, ඔයා තමා මගේ ජීවිතේ මං ලබපු හොඳම සහ වටිනාම තෑග්ග.හැමදාටම වෙනසක් නැතිව ඔය අහිංසක හිනාවයි ආදරෙයි තුරුළු කරන් මගේ 
ජීවිතේ සුවඳවත් කරන් හැමදාටම මං ලඟින්ම ඉන්න.

මගේ හත් පෙති මලට,
කාටවත් නොකළ තරම්.....
කවදාවත්ම නොකළ තරම්...
මං ගොඩාක් ආදරෙ‍යි...!!!!! 









7 comments:

  1. aththatama lassanayi akke...... adare api hiiyagena enawa misak apita adare hoyagena yanna ba.... HODAMA DE HODAMA WIDIYATA WEI.... mn hamadama kiyanne ekane......eth apita ewai watinakama terenna apita dethun sarayak waradila thiyennath one... nathnam e de watinakama terenne na... nedaaa ;) :D

    ReplyDelete
    Replies
    1. ඇත්ත මල්ලි.....එක පාර හරි දේ ලබනවට වඩා වැඩි වටිනකමක් දෙතුන් පාර වැරදිලා ලැබෙන දේ තියෙන්න පුලුවන්...

      Delete
    2. කවදාවත් නැති තරම්
      කාටවත් නොකල තරම්
      ආදරෙයි රත්තරන් :D

      ඔන්න කට්ටියගෙ ඇස්වහ වැදුනොත් මං දන්නෑ :*

      Delete
    3. අපිත් දන්නෑ ඕන්...:P

      Delete
  2. mmm!! m hath pethi male kathawe apith adambarakaara sakshi kaaryao thamai! :) :)

    ReplyDelete
    Replies
    1. ආයිත් අහලා.....ආඩම්බරයි ඔයාලා වගේ යාලුවො ගොඩක් හත් පෙති මලත් එක්ක ඉන්න එක ගැන...^_^

      Delete
  3. නිලීකා අක්කාට මං ප්‍රයිවට් මැසේජ් එකකුත් තිබ්බා. අනේ හැම තැනම ඉරිසියා කරන අය . අක්කයි අයියයි පරිස්සමෙන් ඉන්න. අපේ ආයුෂත් අරන්, සතුටින් මේ සතුට දිගටම තියාගෙන ජීවත් වෙන්න. ඔය දෙන්නට වාසනාව උතුරන්න ඕනෙ. අපිත් මේ වගේ ලස්සන ආදර කතා දකින්න පින් කළා එහෙනං

    ReplyDelete